London olimpiadasında ölkəsiz idmançı - FOTO

Lent.az-ın məlumatına görə, onlardan biri Quor Marial olimpiadalar tarixində ilkə imza atacaq.

28 yaşlı idmançı Cənubi Sudanda doğulub. Lakin bu ölkənin hələ Milli Olimpiya Komitəsi yoxdur. Ona görə də Marial öz ölkəsinin adından yarışa bilmir. İdmançının yaşadığı ABŞ-da isə vətəndaşlığı yoxdur. “Ölkəsiz” qalan Marial Beynəlxalq Olimpiya Komitəsinin verdiyi icazə sayəsində müstəqil idmançı kimi olimpiadada iştirak edəcək.

Qeyd edək ki, Quor Marial doğularkən, Sudan hələ vətəndaş müharibəsi nəticəsində 2 yerə bölünməmişdi. Ailəsi ilə birgə Cənubi Sudandakı kəndlərdən birində yaşayan Marial 8 yaşında ikən şimaldan olan silahlı şəxslər tərəfindən qaçırılaraq, uşaq təlim düşərgəsinə aparılıb. Lakin bir həftə sonra Marial təlimlərdəki digər uşaqla birgə düşərgədən qaçıb. 28 ailə üzvünü itirən Quor öncə Misirə üz tutub. 16 yaşında isə o, sığındığı ABŞ-da atletika ilə məşğul olmağa başlayıb. İdmançı olimpiadaya marafon qaçışı növündə vəsiqə qazanıb.