“Xəzər Lənkəran” 2012-ci il Avropa çempionatının keçirildiyi stadionda

“Xəzər Lənkəran” klubu futbol üzrə Avropa Liqasının II təsnifat mərhələsində Polşa “Lex”i ilə səfər qarşılaşmasını 2012-ci il Avropa çempionatında C qrupundakı görüşlərdən 3-ünün keçirildiyi stadionda oynayacaq. Lent.az-ın məlumatına görə, matç iyulun 26-da Poznan şəhərindəki “Munisipial” stadionunda təşkil olunacaq.

Artıq başlama saatı da məlumdur. Start fiti Bakı vaxtı ilə saat 23:00-da çalınacaq. Hakimlər isə hələ müəyyənləşməyib. 43269 tamaşaçı tutumuna malik arenada Avropa çempionatının İrlandiya – Xorvatiya, İtaliya – Xorvatiya və İtaliya – İrlandiya matçları keçirilib.

“Xəzər Lənkəran”la “Lex” arasında ilk matç iyulun 19-da Lənkəran şəhər stadionunda keçiriləcək. Saat 20:00-da başlanacaq oyunu avstriyalı referi Robert Şörgenhofer idarə edəcək.

Avropa Liqasındakı daha bir təmsilçimiz “İnter” isə Yunanıstan “Asteras”ı ilə səfər matçını iyulun 26-da Tripoli şəhərindəki “Asteras Tripolis” stadionunda keçirəcək. Oyun Bakı vaxtı ilə saat 22:00-da başlanacaq. Bu komandalar arasında ilk görüş iyulun 19-da Bakıdakı “Dalğa Arena”da təşkil olunacaq. Saat 21:00-da startı veriləcək matçda macarıstanlı referi Mihay Fabian fit çalacaq.