Unibank Premyer Liqasında ilk baş məşqçi istefası “Rəvan”dan gəldi

Unibank Premyer Liqasının debütantı Bakının “Rəvan” klubu Bəhmən Həsənovu əsas komandanın baş məşqçi postundan kənarlaşdırıb. Klubun vitse-prezidenti Bəhruz Şirəliyevin Lent.az-a verdiyi məlumata görə, bu haqda qərar klubun ilk 6 turda uğursuz çıxışı ilə əlaqədar qəbul olunub.

Bu, Premyer Liqanın startından bəri ilk baş məşqçi istefasıdır. Şirəliyev bildirib ki, “Rəvan” debütant olsa da, heyətində kifayət qədər təcrübəli futbolçular yer alıb: “Biz çempionata ilk “6-lığ”a düşmək məqsədilə başlamışdıq. Fikrimcə, bu komanda belə zəif nəticələrə layiq deyil. İlk 6 turdan sonra 1 qələbəmiz də yoxdur. Halbuki hazırkı heyətimiz buna qadirdir”.

Həsənovu “Rəvan”ın idman direktoru Vladislav Qədirov əvəzləyib. Lakin Qədirovun baş məşqçi postunda daimi qalıb-qalmayacağı hələ bilinmir. Hazırda klub rəhbərliyi yeni baş məşqçi axtarışlarına da başlayıb. Hər halda Qədirovun qarşıdakı 2 turda komandanın sükanı arxasında olacağı dəqiqdir. Sentyabrın 30-da keçiriləcək VIII turdan sonra Premyer Liqada fasilə yaranacaq. Şirəliyevin sözlərinə görə, fasilə müddətində yeni baş məşqçinin adına tam aydınlıq gələcək.

Qeyd edək ki, Bəhmən Həsənov isə “Rəvan”ın uşaq yaş qruplarına cavabdehlik daşıyacaq.