Unibank Premyer Liqası: Əyalət hökmranlığı

Futbol üzrə Unibank Premyer Liqasında V turun görüşləri keçirilib. Lent.az-ın məlumatına görə, turun mərkəzi görüşündə “Xəzər Lənkəran”la “Neftçi” üz-üzə gəlib.

Son illərin ən prinsipial rəqiblərinin qarşılaşmasının taleyini bir qol həll edib. Lənkəran təmsilçisi “Neftçi”nin oyunçusu Ruslan Abışovun avtoqolu sayəsində qələbə qazanıb. Bununla da baş məşqçi Mirça Rednikin komandası yenilməzliyini davam etdirib.

Premyer Liqada məğlub olmayan daha bir klub isə “Qəbələ”dir. Baş məşqçi Toni Adamsın komandası bu dəfə “Turan”a qalib gəlib. Matçın əvvəllərində çempionatın ən yaxşı bombardiri Sergey Artyuxun qolu ilə hesabda geri düşən “Qəbələ” sonradan 2 qol vuraraq görüşü öz xeyrinə dəyişib.

“Kəpəz” də turu AZAL üzərində inamlı qələbə ilə yekunlaşdıraraq, ilk “3-lüy”ü tamamlayan daha bir əyalət komandası olub. “Bakı” da debütant “Rəvan”ın qapısından 3 top keçirib və nəhayət, öz gücünə qələbəyə sahib çıxıb. Daha öncə paytaxtın eyniadlı klubu “İnter”ə texniki məğlubiyyət sayəsində qalib gəlib.

“İnter” “Simurq”u minimal hesabla yendiyi halda, digər debütant “Sumqayıt Şəhər” çempionatda ilk xalını qazanıb. Baş məşqçi Bernhard Raabın komandası “Qarabağ”la heç-heçə edib.

10 sentyabr

“Bakı” – “Rəvan” (Bakı) – 3:2
Qollar: Aleksandar Soliç, 7; 30. Denis İvanov, 20 - Kristian Torres, 70. Samuel Barlay, 79
Qırmızı vərəqə: Taqım Novruzov, 48

“İnter” (Bakı) – “Simurq” (Zaqatala) – 1:0
Qol: Valeri Abramidze, 53

“Xəzər Lənkəran” – “Neftçi” (Bakı) – 1:0
Qol: Ruslan Abışov, 41 (öz qapısına)

11 sentyabr

“Qəbələ” – “Turan” (Tovuz) – 2:1
Qollar: Viktor Mendi, 15. Luiz Hilario, 54 - Sergey Artyux, 6

“Sumqayıt Şəhər” – “Qarabağ” (Ağdam) – 0:0

“Kəpəz” (Gəncə) – AZAL (Bakı) – 3:1
Qollar: Şahin Kərimov, 1. Armand Feutchine, 36. Yuri Fomenko, 81 - Ervin Bulku, 45+2.

Turnir cədvəli

	Komanda	O	Q	H	M	Qollar	Xallar
1	Xəzər Lənkəran	5	4	1	0	10-3	13
2	Qəbələ	5	3	2	0	6-3	11
3	Kəpəz	5	3	0	2	11-8	9
4	Bakı	5	2	2	1	6-5	8
5	Qarabağ	4	2	1	1	3-2	7
6	AZAL	5	2	1	2	8-8	7
7	Neftçi	4	2	0	2	6-4	6
8	Turan	5	2	0	3	6-7	6
9	İnter	4	2	0	2	2-4	6
10	Rəvan	5	0	2	3	6-9	2
11	Simurq	5	0	2	3	1-6	2
12	Sumqayıt Şəhər	4	0	1	3	2-8	1

Bombardirlər: Sergey Artyux (“Turan”) - 4 qol, Ceyhun Sultanov (“Kəpəz”), Emeka Opara (“Xəzər Lənkəran”), Bahodir Nasimov (“Neftçi”), Yuri Fomenko (“Kəpəz”) – hamısı 3 qol.