Respublika stadionundan sovet dövrünə aid bütün atributlar yığışdırılacaq

Akif İsmayılov: “Mərkəzi arenanın ərazisində otel tikiləcək”

Azərbaycan Prezidenti İlham Əliyevin sərəncamı ilə Tofiq Bəhramov adına Respublika stadionunun əsaslı təmiri və yenidən qurulması məqsədilə görüləcək işlər zamanı arenadan sovet dövrünə məxsus bütün atributlar yığışdırılacaq. Bu haqda Lent.az-a mərkəzi arenanın direktoru Akif İsmayılov məlumat verib.

Onun sözlərinə görə, stadionun mərkəzi girişində və digər hissələrində qoyulan SSRİ-nin oraq və çəkicdən ibarət gerbi götürüləcək. Meydançanın İosif Stalinin şərəfinə tikilən “C” hərfli görkəmi də dəyişdirilə bilər. Bu isə yenidənqurma işlərinin hansı eskiz əsasında aparılmasından asılı olacaq. Amma istənilən halda, azarkeşlər olan hissələrində meydançanın üstünün örtüləcəyi dəqiqdir.

Əsaslı təmir işlərinə sentyabrın sonları – oktyabrın əvvəllərində başlanacaq. 2012-ci ilin martınadək davam edəcək təmir işləri çərçivəsində əsas və ehtiyat meydançanın ot örtüyü, arenanın plastik oturacaqları, pilləkənləri dəyişdiriləcək, stadionun giriş qapıları və ətrafı müasir formaya salınacaq.

İsmayılov stadion ərazisində otelin tikiləcəyini də bildirib. Otel idmançılar və qonaqlar qalacaqlar. Onun neçə mərtəbədən ibarət olacağı bilinməsə də, tikintisinə gələn ilin aprelindən başlanılacağı dəqiqdir.

Qeyd edək ki, prezident İlham Əliyev Tofiq Bəhramov adına Respublika stadionunun əsaslı təmiri və yenidən qurulması üçün 2011-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Gənclər və İdman Nazirliyinə 10 milyon manat ayrılmasına dair sərəncam imzalayıb.

Elşən MƏMMƏDOV