“Azərbaycan yığmasını ud, pivə qonaqlığı qazan”

Futbol üzrə Qazaxıstan milli komandasının çexiyalı baş məşqçisi Miroslav Baranekə 2012-ci il Avropa çempionatının seçmə qrup matçında Azərbaycan yığması üzərində qələbə təqdirində pivə qonaqlığı veriləcək. Lent.az-ın “Tengrinews.kz” saytına istinadən verdiyi məlumata görə, yerli azarkeşlər Baranekə çex pivəsi içirəcəklər.

Təcrübəli mütəxəssis isə “qonaqlıq”da iştirakına yox, qələbə üçün çalışacaqlarına söz verib: “Cari tsiklin əvvəlki seçmə qrup oyunlarında biz nə xal yığa, nə də qol vura bilmişik. Məncə, bu, futbolçularımın Azərbaycan yığması üzərində qələbə qazanması üçün əla motivasiyadır. Biz bu oyunun vacibliyini gözəl anlayırıq. Bizdən qələbə gözlədiklərini başa düşürük. Ona görə də heç kimi məyus etməmək naminə hər şey edəcəyik. Məşqçilər heyəti və federasiya rəhbərliyi Azərbaycanla oyuna hazırlıq üçün böyük iş görüb. Lakin rəqib asan deyil, 3 xalı bizə rahatca heç kim verməyəcək. Onu gərgin mübarizədə qazanmaq lazımdır”.

Baranek bu dəfə milliyə çoxlu yeni və gənc futbolçular çağırıb. O, həmin oyunçuları sınaqdan çıxarmaq fikrindədir: “Qazaxıstan futbolunda yeni adlar parlamalıdır. Hər birini izlədiyimdən, onlara güvənirəm”.

Qeyd edək ki, Qazaxıstan – Azərbaycan matçı iyunun 3-də Astanada keçiriləcək.