Uinston Parks və Georgi Adamiya mükafatlandırıldı

Lent.az-ın məlumatına görə, aprel ayında ən yaxşı futbolçu adına “Xəzər Lənkəran”ın hücumçusu Uinston Parks seçilib. May ayının ən yaxşısı adına isə “Qarabağ”ın yarımmüdafiəçisi Georgi Adamiya yiyələnib.

Qaliblər ölkə birinciliyində iştirak etmiş 12 futbol klubunun baş məşqçi və kapitanları həmçinin 23 KİV nümayəndəsinin iştirakı ilə keçirilən sorğuya əsasən müəyyən olunub. Aprel ayının qalibi olan Uinston Parks respondentlərin 30, Georgi Adamiya isə 58 faizinin səsini toplayıb.

Qeyd edək ki, Unibank-ın təsis etdiyi mükafatın təqdimetmə mərasimində qalib futbolçular iştirak etməyib. Uinston Parks ölkəsində istirahət etdiyindən, Adamiya isə Gürcüstan milli komandasının düşərgəsində olduğundan tədbirə qatılmayıb. Qalib futbolçulara təqdim olunan 1111 manat pul mükafatını və qiymətli hədiyyələri təmsil etdikləri klubun mətbuat xidmətinin rəhbərləri qəbul edib.

Elşən MƏMMƏDOV