“Baku “Fires”in şikayət məktubuna baxılıb

Azərbaycan Boks Federasiyasının mətbuat xidmətindən Lent.az-a verilən məlumata görə, komitə məsələyə bir neçə gün əvvəl baxsa da, yalnız indi protesti cavablandırıb.

Cavabda Fransadakı qarşılaşmada hakimlərin obyektiv qərarlar qəbul etdiyi, hər hansı pozuntunun olmadığı vurğulanıb. Beləliklə, Nizam-İntizam Komitəsi “Baku Fires”in etirazını haqsız sayıb. Ancaq “Baku Fires” rəhbərliyi komandamızın finalda mübarizə aparmalı olduğunu düşünür və bu qərarı ədalətsizlik kimi qiymətləndirir: “Hər kəs Bakıda keçirdiyimiz döyüşdə də gördü ki, biz fransızlardan güclüyük. Təəssüf ki, Parisdə hakimlərin ədalətsizliyi ilə üzləşdik. Amma həyat davam edir. İki boksçumuz Olimpiadaya lisenziya uğrunda döyüşəcək. Onların qələbə qazanacağına ümid edirik”.

Qeyd edək ki, “Baku Fires” “Paris United”i Bakıda 4:1 hesabı ilə məğlub etsə də, səfərdə fransızlara “quru” hesabla uduzaraq, yarışdan kənarda qalıb. Ancaq “Paris United”in qalibiyyətində hakimlərin də “rolu” olub. 85 kq çəki dərəcəsində mübarizə aparan Rizvan Əlimuradov Hrvoje Sepi məğlub etsə də, iki avropalı hakim 48:47 hesabı ilə xorvatiyalı boksçunun qələbəsini qeydə alıb. Halbuki argentinalı referi 50:45 hesabı ilə həmyerlimizin qalibiyyət əldə etdiyini bildirib.