“Xəzər Lənkəran”ın 13-cü oyunçusu kimdir?

Lent.az-ın klubun rəsmi saytına istinadən verdiyi məlumata görə, Xəlilov XXVIII turun AZAL-la qarşılaşmasında meydançaya buraxılıb.

Lənkəran komandasına qışda transfer olunan 20 yaşlı müdafiəçiyə baş məşqçi Mirça Rednik 86-cı dəqiqədə şans verib. Bununla da Xəlilov rəsmi matçlarda “Xəzər Lənkəran” forması geyinən oyunçuların siyahısına daxil olub. Bu matçadək 125 futbolçuya “ağ-yaşıllar”ın şərəfini qorumaq nəsib olmuşdu. Xəlilov bu siyahıya 126-cı kimi daxil olub. O, komandada bu il debüt edən 13-cü oyunçu olub.

2011-ci ilin arxada qalan hissəsində Simao Bruno, Andrey Mureşan, Adrian Pit, Hristu Kiaku, Adrian Skarlatake, Julius Vobay, Elnur Abdullayev, Aleksandr Pitsurka, İbrahima Banqura, Kosmin Fransinesku, Nikulae Muşat və Yevgeni Kopil də “Xəzər Lənkəran”da debüt ediblər. Xəlilov komandanın 62-ci yerli futbolçusu olub. “Xəzər Lənkəran”da oynamış digər 64 oyunçu isə legionerdir.