Əfsanəvi klub 1 avroya satıldı

Lent.az-ın məlumatına görə, buna klubun son illər ciddi maliyyə böhranı ilə üzləşməsi səbəb olub.

“Ferentsvaroş” 2008-ci ildə ingiltərəli iş adamı Kevin Makkeyb tərəfindən 33 milyon avroya satın alınıb. Lakin klub üzləşdiyi maddi çətinlikləri heç cür arxada qoya bilməyib. Bu səbəbdən Makkeyb “Ferentsvaroş”u aldığından 14 milyon avro aşağı qiymətə satmaq istədiyini bəyan edib. Lakin yenə alıcı tapılmayıb. Nəticədə ingiltərəli iş adamı zərərlə üzləşən klubu ZRT firmasına simvolik məbləğə - 1 avroya satıb. O, Macarıstanda ən çox azarkeş kütləsinə malik və ən çox ölkə çempionluğunu qazanan “Ferentsvaroş”u almaqla səhvə yol verdiyini bildirib. Makkeyb Macarıstanda sponsorların verdikləri sözləri yerinə yetirmədiklərini, bu səbəbdən, ölkəni tərk etməyi qərara aldığını söyləyib.

Qeyd edək ki, 1899-cu ildə qurulan “Ferentsvaroş” 28 dəfə Macarıstan çempionluğu, 20 dəfə ölkə kubokunu, 1964-1965-ci il mövsümündə isə finalda İtaliyanın ünlü klubu “Yuventus”u yenərək, hazırkı UEFA Kubokunu qazanıb. “Yaşıl-ağlar” 1975-ci ildə Avropa Kuboklar Kubokunda finaladək irəliləyiblər. Həlledici görüşdə bu komandanın qarşısını Kiyev “Dinamo”su kəsib - 3:0. Macarıstan futbolunun əfsanəvi isimlərindən Şandor Koçiş və Zoltan Çibor kimi futbolçuların da formasını geyindiyi “Ferentsvaroş” ölkənin ən çox azarkeşə malik klubudur.