“Qalatasaray” ın idarə heyəti istefaya göndərildi

APA-nın məlumatına görə, İstanbuldakı Lutfi Kırdar konqres mərkəzində keçirilən qurultayda “Qalatasaray” Təhsil Fondunun prezidenti Adnan Kıraç olmaqla bir qrup Adnan Poladın və sədrlik etdiyi idarə heyətinin istefa verməsini, növbədənkənar qurultay keçirilməsini tələb ediblər.

“Qalatasaray”ın prezidenti Adnan Polad qurultayındakı çıxışında ona və idarə heyətinə müxalif olanlara sərt cavab verib. O deyib ki, klubun ötən ilki xərclərinin təsdiq edilməsinin qarşılığında növbədənkənar qurultay təklifini qəbul etməyib: “ Mən bunu qəbul etmirəm. Qalatasaray demokratik qaydaların işlədiyi klubdur, ona görə də hamını demokratiyaya hörmət etməyə çağırıram”.

A. Poladın çıxışı zamanı salondan etirazlar edilib. Poladın çıxışını idarə heyətinin 3 üzvü alqışlamayıb.

Doqquz saat davam edən qurultayda klubun maliyyə hesabatı qənaətbəxş sayılıb və qəbul edilib. Lakin klubun idarəçilərinin fəaliyyəti qənaətbəxş hesab edilməyib və idarə heyətinin
buraxılmasına qərar verilib.

Qərara görə, 30 gün müddətində növbədənkənar qurultay keçiriləcək. İndiki İdarə Heyətinin üzvlərindən heç birinə növbəti dəfə namizəd olmaq şansı da tanınmayıb.

A. Polad qərara “bugünkü qərarların “Qalatasaray”a problem yaratmayacağına ümid etdiyini” deməklə münasibət bildirib.