Çempionlar Liqası: “Real” növbəti mərhələnin bir addımlığında

Lent.az-ın məlumatına görə, Fransadakı heç-heçədən sonra “Real Madrid” “Lion”u Fransada üstələmək niyyətindədir.

İngiltərənin “Çelsi” klubu isə Danimarkada “Kopenhagen” üzərində əldə etdiyi 2:0 hesablı səfər qələbəsindən sonra cavab oyununa tam əminliklə çıxacaq.

“Çelsi” (İngiltərə) – “Kopenhagen” (Danimarka)
Baş hakim: Sveyn Oddvar Moen (Norveç)
İlk oyun - 2:0

Ötən Çempionlar Liqasının 1/8 finalında İtaliya “İnter”inə məğlubiyyət “Çelsi”nin ambisiyalarının üstündən xətt çəkmişdi. İndi “zadəganlar” “Kopenhagen”lə cavab matçında əvvəlki səhvlərini təkrarlamaq niyyətində deyillər. İlk görüşdə londonlular Kopenhagendə 2:0 hesablı qələbəyə seviniblər. Hər iki qolu Nikolya Anelka vurub. “Çelsi” ardıcıl 8-ci mövsümdür ki, 1/8 final həyəcanı yaşayır. Son 7 cəhdin 5-də bu klub ən azı yarımfinaladək irəliləyib. Danimarka çempionu isə 1/8 finala ilk dəfə vəsiqə qazanıb. Avropa Kuboklarında “Çelsi” səfər qələbələrindən sonra 6 dəfə mərhələ adladığı halda, “Kopenhagen” 8 dəfə öz meydançasında uduzub və 7 dəfə növbəti mərhələyə yüksələ bilməyib.

“Real Madrid” (İspaniya) – “Lion” (Fransa)
Baş hakim: Damir Skomina (Sloveniya)
İlk oyun – 1:1

“Real Madrid” klubu özü üçün əlverişsiz olan “Lion”u “Santyaqo Bernabeu”da nəhayət, üstələmək ümidi ilə qəbul edəcək. Fevralın 22-də keçirilmiş ilk qarşılaşmada ispaniyalılar “Jerlan” stadionunda ilk qələbə qazanmağa çox yaxın olublar. Lakin 65-ci dəqiqədə sabiq “Lion”lu Kərim Benzemanın qoluna meydan sahibləri son dəqiqələrdə Bafetimbi Qomisin dəqiq zərbəsi ilə cavab veriblər. “Real Madrid” və “Lion” arasında İspaniya paytaxtında keçirilmiş əvvəlki 3 qarşılaşmanın hamısı heç-heçə ilə nəticələnib. 2010-cu ildə keçirilmiş 1/8 final matçında “Lion” səfərdə 1:1 hesablı heç-heçə əldə edib ki, bu da növbəti mərhələ üçün yetərli olub. İndi baş məşqçi Joze Mourinyonun rəhbərliyi altında “kral klubu” “qara zolağ”a son qoymağa və 2003-2004-cü il mövsümündən sonra ilk dəfə ¼ finala vəsiqə qazanmağa çalışacaq. Ümumiyyətlə, Fransa komandaları ilə oynadığı ev qarşılaşmalarında “Real Madrid” 7 qələbə qazanıb, 3 heç-heçə edib və 1 dəfə uduzub. “Lion” isə İspaniyada cəmi 1 dəfə qalib gəlib, 3 heç-heçə və 4 məğlubiyyət alıb.

Qeyd edək ki, artıq Çempionlar Liqasının ¼ finalına “Mançester Yunayted”, “Tottenhem” (hər ikisi İngiltərə), “Şaxtyor” (Ukrayna), “Şalke 04” (Almaniya), “Barselona” (İspaniya) və “İnter” (İtaliya) komandaları vəsiqə qazanıb.