“Azərreyl” Rusiyanın ən məşhur komandasına qalib gəldi

Lent.az-ın məlumatına görə, rəqib Rusiyanın ən məşhur voleybol komandası sayılan “Uraloçka-NTMK” olub.

Bakıdakı “Sərhədçi” İdman Olimpiya Mərkəzində baş tutan qarşılaşmada “Azərreyl” qalib gəlib – 3:2. İlk setdən 25:22 hesablı üstünlüklə ayrılan təmsilçimiz ikinci setdə eyni hesabla yenilib. Üçüncü setdə baş məşqçi Vüqar Əliyevin komandası üstün olub - 25:21. Ən gərgin oyun dördüncü setə təsadüf edib. “Azərreyl” normal hesab həddindən çıxan seti uduzub – 29:31. Bu səbəbdən, görüşün taleyi “tay-breyk”də həll olunub. Voleybolçularımız 15:13 hesablı qələbə sayəsində görüşün qalibinə çevriliblər. Cavab oyunu martın 19-da Rusiyanın Nijni Tagil şəhərində olacaq.

Qeyd edək ki, “Çağırış Kuboku”nun digər yarımfinal matçında Azərbaycanın daha 2 klubu – “İqtisadçı” ilə “Lokomotiv” üz-üzə gələcək. Martın 16-da “Sərhədçi”də keçiriləcək oyun saat 18:00-da başlanacaq. Cavab görüşü isə martın 20-də elə həmin arenada baş tutacaq.