“Bakı”nın futbolçuları “Neftçi” üzərində qələbəyə köklənib

Lent.az-ın məlumatına görə, bu fikirləri “Bakı” klubunun futbolçusu İbrahim Karqbo Unibank Premyer Liqasının final mərhələsində “Neftçi” ilə martın 13-də keçirəcəkləri oyun haqda deyib. 29 yaşlı yarımmüdafiəçi “Neftçi”ni yenərək, azarkeşləri, klub rəhbərliyi və bütün “Bakı” ailəsini sevindirəcəklərini bildirib. O, azarkeşləri fəal olmağa çağırıb: “Derbi qabağı azarkeşlərimizə bizi hər zaman dəstəklədikləri üçün minnətdarlığımı bildirirəm. Bakı derbisində də tərəfdarlarımızın fəal olacağına əminəm”.
“Altılıq” oyunları barədə danışan syerra-leoneli futbolçu bu mərhələdə oyunların daha gərgin keçəcəyini, “Bakı”nın bütün oyunlara eyni məsuliyyətlə hazırlaşdığını vurğulayıb.

Serbiyalı müdafiəçi Stevan Bates də “Neftçi”ni yenmək üçün meydançaya çıxacaqlarını söyləyib: “Neftçi” güclü komandadır və rəqiblərimizin turnir cədvəlində ilk pillədə yer alması oyuna əlavə rəng qatır. Biz hər oyuna yalnız qələbə üçün çıxırıq, sabah da belə olacaq. Güclü rəbiqlərlə oynamaq bizə əlavə ruh verir. Məncə, “Neftçi” və “Xəzər-Lənkəran”la oyunlar daha çətin alınacaq”.

Bates “altılıq” oyunlarının tam fərqli keçəcəyini də əlavə edib. Final mərhələsində zəif rəqibin olmadığını deyən təcrübəli müdafiəçi “altılıq”dakı bütün komandaları bir-birilərinə layiq sayıb.