Boksçularımız erməni və bolqarı yenib, medal qazandılar

Lent.az-ın məlumatına görə, bu dəfəki yarışda rekord sayda – 22 ölkənin 150 boksçusu qələbə uğrunda mübarizə aparıb.

Azərbaycan milli komandası Yevgeni Kotovun rəhbərliyi altında turnirdə qarışıq heyətlə yarışıb. Bolqarıstana son ölkə çempionatının mükafatçıları ilə yanaşı, bəzi qaliblər də aparılıb. Komandamızın 2 üzvü – Elvin İsayev (60 kq) və Tamerlan Abdullayev (64 kq) vətənə bürünc medalla dönüblər. Abdullayevin ¼ finalda Ermənistan boksçusu Volodya Hayrapetyan üzərində qələbəsi parlaq olub. Boksçumuzun zərbələri qarşısında davam gətirməyən rəqib döyüşü davam etdirməkdən imtina edib. Sinqapurda keçirilmiş Yeniyetmələrin ilk Olimpiya Oyunlarının gümüş mükafatçısı Elvin İsayev 1/4 finalda yerli idmançı Luben Todorovu 7:0 hesabı ilə məğlub edib. İsayev yarımfinalda ingiltərəli Martin Varda uduzaraq, bürünc medalla kifayətlənib. Tamerlan Abdullayev isə finala gedən yolda Avropa çempionatının bürünc mükafatçısı ukraynalı Aleksandr Klyuçkoya uduzub.

Digər boksçularımız – Şaban Şahpələngov (52 kq), Elnur Əliyev (56 kq), Emil Məhərrəmov (69 kq), Sərxan Cabbarov (91 kq) və Fərid Paşayev (+91 kq) isə Bolqarıstanda mükafatsız qalıblar.