Qvardiola “Barselona” ilə müqaviləsini uzadır

Lent.az-ın klubun rəsmi saytına istinadən verdiyi məlumata görə, 2011-2012-ci il mövsümünün sonunadək nəzərdə tutulan müqavilə yaxın günlərdə imzalanmalıdır.

Qvardiola motivasiyasını itirməmək üçün qısa müddətli anlaşmaya üstünlük verdiyini dəfələrlə açıqlayıb. O, “Barselona”ya 2008-ci ilin yayında rəhbərlik edib. Gənc mütəxəssis hollandiyalı Frank Raykardı əvəzləyib. Qvardiolanın rəhbərliyi altında “Barsa” iki dəfə İspaniya çempionluğunu və Superkubokunu, 1 dəfə isə ölkə kubokunu və Çempionlar Liqasını qazanıb.

2010-2011-ci il mövsümündə Kataloniya klubu İspaniya çempionatında birinci yerdə gedir. Bu komanda ən yaxın izləyicisi “Real Madrid”i 7 xal qabaqlayır. Fevralın 5-də ardıcıl 16-cı qələbəsini qazanan “Barselona” bu göstəricidə çempionatlar rekordunu təzələyib. İspaniya Kubokunda finala çıxan “Barsa”nı “Real Madrid”, Çempionlar Liqasının 1/8 finalında isə İngiltərə “Arsenal”ı gözləyir.