Azərbaycan klubu ¼ finalda

Lent.az-ın məlumatına görə, 1/8 final mərhələsinin fevralın 8-də keçirilmiş cavab görüşündə komandamız Rumıniya “Stiinta”sını yenib – 3:1.

“Sərhədçi” Olimpiya İdman Mərkəzində baş tutan qarşılaşmanı 1000 tamaşaçı izləyib. İlk 2 setdən 25:17 və 26:24 hesablı üstünlüklə ayrılan “İqtisadçı” 3-cü setdə uduzub – 23:25. Lakin 4-cü set komandamız üçün xeyli rahat keçib – 25:10.

Beləliklə, fevralın 2-də Bakau şəhərində keçirilmiş ilk görüşdən də qalib (3:0) ayrılmış klubumuz iki oyunun nəticəsində daha bir mərhələ adlayıb. ¼ finalda “İqtisadçı” “Kralovo Pole” (Çexiya) – Daufin” (Belçika) matçının qalibi ilə üz-üzə gələcək.

Qeyd edək ki, daha 2 klubumuz – “Lokomotiv” və “Azərreyl” də “Çağırış Kuboku”nun ¼ finalına çıxmağa çox yaxındır. İlk görüşdə “Lokomotiv” Bakıda Kipr “Apollon”unu, “Azərreyl” isə Ukraynanın Odessa şəhərində Ximik”i darmadağın edib - 3:0. Cavab oyunlarının nəticələri bu gün məlum olacaq.