“Qəbələ”nin futbolçuları İngiltərə radiosunda

Klubun mətbuat xidmətindən Lent.az-a verilən məlumata görə, fevralın 8-də “Mançester Yunayted”lə qarşılaşacaq komandamız bundan bir gün əvvəl Liverpulda matç öncəsi son məşqinə çıxıb.

Qarşılaşma Bakı vaxtı ilə saat 22:45-də “qırmızı şeytanlar”ın əsas komandasının məşq etdiyi Karrinqtonda baş tutacaq. “Qəbələ” “Liverpul”, “Everton”, “Blekbern” və “Şeffild Yunayted” kimi tanınmış və köklü klublarla da üz-üzə gələcək ilk klubumuz kimi Azərbaycan futbol tarixinə adını yazdıracaq.

14 yaşlı futbolçular İngiltərədə təkcə futbol oynamaqla kifayətlənməyəcəklər. Yerli medianın diqqət mərkəzinə düşən “Qəbələ” “Mersisayd Radio”dan dəvət alıb. Bu gün komandanın 2 futbolçusu radionun qonağı olacaq və dinləyiciləri “Qəbələ”, Azərbaycan və ölkə futbolu haqqında məlumatlandıracaqlar. Azərbaycanlı futbolçuların ölkəmizi tanıtmaq məqsədilə bir neçə belə tədbirdə iştirakı gözlənilir.