”Xəzər Lənkəran”dan daha 2 transfer

Lent.az-ın klubun rəsmi saytına istinadən verdiyi məlumata görə, rumıniyalı Xristu Romana Kyaku və Nikulae Konstantin Muşatla 1 illik müqavilə bağlanılıb.

Hücumameylli yarımmüdafiəçi olan 24 yaşlı Kyaku Lənkəran komandasına Buxarest “Dinamo”sundan qoşulsa da, son iki ili digər Rumıniya klubu “Timişoara”nın heyətində icarədə keçirib. Futbolçu vaxtilə ölkəsinin 21 yaşlılardan ibarət milli yığmasına da çağırılıb və 3 qola imza atıb. Rumıniyanın müxtəlif klublarından əlavə Polşa “Visla”sının da şərəfini qorumuş Kyaku üçün “Xəzər Lənkəran” çıxış etdiyi ikinci xarici komandadır.

Ötən ilin dekabrında 24 yaşı tamamlanan Muşat isə sol cinah yarımmüdafiəsidir. Yeni transfer Rumıniyanın “Dinamo” (Buxarest) klubunun yetirməsidir və “Xəzər Lənkəran”a məhz oradan gəlib. Muşat karyerası ərzində icarə əsasında Rumıniyanın müxtəlif klublarının da formasını geyinib ki, bunlardan “Universitatya Kluj” və “Unirea”nı qeyd etmək olar.