“Çelsi” Droqbadan imtina edir

Lent.az-ın “The Sun”a istinadən verdiyi məlumata görə, mövsümün sonunda komandanı müdafiəçi Joze Bosinqva, yarımmüdafiəçi Yuri Jirkov, Con Obi Mikel və Floran Maluda, eləcə də hücumçu Didye Droqba tərk edəcək.

Lakin ABŞ-ın “Nyu-York Red Bulls” klubuna keçəcəyi gözlənilən hücumçu Nikolya Anelka bu siyahıya düşməyib. “Çelsi”nin bir neçə yüksək ödənişli futbolçudan imtinasının səbəbi də məlumdur. İki yeni futbolçu – hücumçu Fernando Torres və müdafiəçi David Luisin transferi üzündən klubun xərcləri 75 milyon funta çatıb. “Zadəganlar” Torresi “Liverpul”dan, David Luisi isə Portuqaliya “Benfika”sından alıblar. Bu transferlər UEFA-da narahatlıq doğurub. Avropa futbol qurumunun rəhbərliyi hesab edir ki, klubların qazandıqlarından çox xərcləməməlidirlər. “Çelsi” daxilindəki mənbə cari mövsümdə kifayət qədər yaxşı oynamayan futbolçulara əmək haqlarının azaldılmasına qərar verildiyini bildirib.