Azərbaycan çempionatının qalibləri mükafatlandırıldı

Lent.az-ın məlumatına görə, Mərkəzi Bankın inzibati binasında təşkil olunan tədbirdə Azərbaycan Şahmat Federasiyasının prezidenti Elman Rüstəmov mükafatlara layiq yerlər tutan şahmatçıları təbrik edib.

O, ölkə çempionatının gərgin mübarizə şəraitində keçdiyini bildirib. E.Rüstəmov bunu Azərbaycanda şahmata dövlət səviyyəsində göstərilən qayğı ilə əlaqələndirib. Daha sonra qadınların yarışında birinci yeri tutan Türkan Məmmədyarova, ikinci yeri tutan Zeynəb Məmmədyarova və üçüncü yerin sahibi Gülnar Məmmədova medal, diplom və pul mükafatları, qalan 9 pillənin sahiblərinə isə diplom və pul mükafatları təqdim edilib.

Türkan Məmmədyarova çempionatın yüksək səviyyədə keçdiyini bildirib. T.Məmmədyarova qadın şahmatçılarımızın gücləndiklərini və bunun komanda hesabındakı nəticələrdə özünü göstərəcəyinə ümid etdiyini əlavə edib. O, qarşıdakı Avropa çempionatında daha yaxşı nəticələr göstərəcəklərinə ümid etdiyini söyləyib.

Kişilərin mübarizəsində birinci yeri Nicat Məmmədov, ikinci yeri Rüfət Bağırov, üçüncü yeri isə Qədir Hüseynov tutub. Onlara da medal, diplom və pul mükafatları verilib. Qalan 9 pilləni tutanlar isə diplom və pul mükafatlarına sahib olublar.

Nicat Məmmədov mükafata layiq yerlər tutan digər şahmatçıları təbrik edib. O, çempionatın xüsusən son turlarında gərgin mübarizənin getdiyini vurğulayıb. N.Məmmədov bütün şahmatçılara uğurlar arzulayıb.

Elşən Məmmədov