17:30 1 iyul 2009

Bakıda İsrail futbolçularına güclü təhlükəsizlik tədbirləri

Məşqə jurnalistlər də buraxılmadı

Bu gün İsrailin “Pney Yequda” klubunun Tofiq Bəhramov adına respublika stadionunda keçirdiyi məşq həddən artıq gücləndirilmiş təhlükəsizlik tədbirlərilə gerçəkləşib. Lent.az-ın məlumatına görə, Azərbaycan tərəfini təmsil edən polis əməkdaşları və mühafizəçilər hətta klubun baş məşqçisinin mətbuat konfransına gedən jurnalistləri tədbirin keçirildiyi otağa onların sənədlərini olduqca ciddi şəkildə yoxladıqdan sonra buraxıblar. Mühafizəçilər bunu onlara verilən göstərişlə izah edib.

Mətbuat konfransı keçirildikdən sonra isə jurnalistləri həmişəkindən fərqli olaraq birbaşa futbol meydançasına gedən qapıdan çıxmasına icazə verməyiblər: jurnalistlər otaqdan birbaşa bayıra çıxarılıb. İsrail futbolçularının məşqini nəinki sadə azarkeşlər, heç jurnalistlərin də izləməsinə icazə verilməyib. Bu, “məşqin qapalı keçirilməsi” ilə izah olunsa da, qeyd olunan səbəb inandırıcı görünməyib. Belə ki, adətən jurnalistlərə bütün əcnəbi klubların məşqini izləməyə, ən azından bir neçə dəqiqəlik kadrlar götürülməsinə icazə verilir. Ancaq bu dəfə məşqdə heç bir kənar şəxsin, o cümlədən jurnalistlərin iştirakına icazə verilməyib.
Qeyd edək ki, “Simurq”-“Pney Yequda” oyunun sabah saat 20.00-da Tofiq Bəhramov adına Respublika stadionunda keçiriləcək.

Elşən Məmmədov
# 218

Oxşar yazılar