Olimpiya çempionunun evi yağmalandı

2008-ci il Pekin Yay Olimpiya Oyunlarında 3 qızıl medal qazanan Yamayka sprinteri Useyn Boltun evinə oğru girib.

Lent.az-ın “France Presse”ə istinadən verdiyi məlumata görə, oğrular məşhur idmançının mənzilindən elektron avadanlıqlar aparıblar. Artıq Yamayka polisi hadisə ilə bağlı araşdırmaya başlayıb. Hadisə barədə polisi Useyn Boltun qardaşı Sadeke məlumatlandırıb. O, başqa otaqda yatdığı vaxt oğrular evdən noutbuk, mobil telefonlar və rəqəmsal videokameranı aparıblar. Həmin gecə idmançının özü evdə olmayıb. Polisdən bildirilib ki, oğurlanmış əşyaların ümumi dəyəri 1100 dollar olub.

Bolt iyunun 17-də Çexiyanın Ostrava şəhərində keçirilmiş turnirdə 100 metrlik məsafəni 9,77 saniyəyə qaçaraq, Pekin olimpiadasında özünün müəyyənləşdirdiyi dünya rekordundan 100 mikrosaniyə geri qalıb. Ostravada rekordunu yeniləyə bilsəydi, Bolt təşkilatçılardan 100 min dollar bonus qazanacaqdı.