Həyat yoldaşınız sizdən uzaqlaşır? - Evlilikdə diqqət çəkən 7 əlamət

Münasibətlərdə böhran həmişə mübahisələr və ya boşanmaq barədə söhbətlərlə başlamır. Bəzən ər-arvad arasındakı emosional məsafə səssizcə artır: söhbətlər azalır, bir-birinin həyatına maraq zəifləyir, gündəlik qayğı və nəvaziş unudulur.

Lent.az xarici mediaya istinadla xəbər verir ki, “Psychology Today” nəşri evlilikdə problemlərə işarə edə bilən yeddi əlaməti sadalayıb.

1. Söhbətlər getdikcə azalır

Əvvəllər gün ərzində baş verənləri danışır, hisslərinizi bölüşür və bir-birinizlə məsləhətləşirdinizsə, indi ünsiyyətin yalnız məişət məsələləri ilə məhdudlaşması emosional uzaqlaşmaya işarə edə bilər.

Xüsusilə tərəflərdən birinin problemləri müzakirə etməkdən və münasibəti yaxşılaşdırmaq cəhdlərindən yayınmasına diqqət yetirmək lazımdır.

2. Toxunuşlar və nəvaziş azalır

Dəyişikliklər gündəlik davranışlarda da görünə bilər. Həyat yoldaşınız sizi daha az qucaqlayır, toxunuşlardan yayınır və intim yaxınlığa əvvəlki qədər təşəbbüs göstərmir. Hətta birlikdə istirahət edərkən də fiziki məsafə saxlaya bilər.

Lakin bu davranışlar mütləq hisslərin bitməsi demək deyil. Yorğunluq, stress və başqa şəxsi çətinliklər də nəzərə alınmalıdır.

3. Gündəlik qayğı yoxa çıxır

Bir fincan qəhvə hazırlamaq, halınızı soruşmaq və ya ağır gündən sonra kömək etmək kiçik görünsə də, yaxınlığı qoruyan davranışlardır.

Belə diqqət tədricən yoxa çıxırsa və ehtiyaclarınız tez-tez nəzərə alınmırsa, bu barədə səmimi danışmağa dəyər.

4. Xarici görünüşə münasibət dəyişir

Yeni geyimlər almaq, saç düzümünü dəyişmək və görünüşə daha çox vaxt ayırmaq insanın özünə qayğı göstərmək istəyindən irəli gələ bilər. Bunlar özlüyündə evlilikdə problem olduğunu göstərmir.

Ancaq həmin dəyişikliklərlə yanaşı, insan daha qapalı davranır, birlikdə vaxt keçirməkdən yayınır və həyat yoldaşına marağı azalırsa, vəziyyəti bütövlükdə qiymətləndirmək lazımdır.

5. Planlar artıq birlikdə müzakirə edilmir

Əvvəllər planlarını sizinlə bölüşən və ortaq razılaşmaları nəzərə alan həyat yoldaşınız sonradan qərarları təkbaşına verməyə başlaya bilər. Plan dəyişiklikləri barədə xəbər verməməsi və fikrinizlə maraqlanmaması da diqqət çəkə bilər.

Bəzən əksinə, insan hər addımını həddindən artıq təfərrüatla izah etməyə başlayır. Bunların heç biri təkbaşına yalan və ya xəyanət sübutu deyil. Lakin davamlı davranış dəyişiklikləri qarşılıqlı etimadı müzakirə etmək üçün səbəb ola bilər.

6. Ortaq gələcək arxa plana keçir

Şəxsi məkanın və fərdi maraqların olması sağlam münasibətin təbii hissəsidir. Problem müstəqillik getdikcə ayrı həyat yaşamağa çevrildikdə yaranır.

Böyük maliyyə qərarlarının məsləhətləşmədən verilməsi, uzunmüddətli planlarda həyat yoldaşının nəzərə alınmaması və onun vacib məsələlərdən kənarda saxlanılması buna nümunədir.

7. Narazılıq daha çox dilə gətirilir

“Özümü xoşbəxt hiss etmirəm”, “həyatımda dəyişiklik istəyirəm” və ya “münasibətimizin hara getdiyini bilmirəm” kimi cümlələrə diqqətlə yanaşmaq lazımdır.

Bu sözlər həmişə ayrılmaq qərarı demək deyil. Bəzən insan çətin bir söhbətə başlamağa və hisslərini qarşı tərəfə çatdırmağa çalışır.

Nə vaxt münasibətə daha çox diqqət ayırmaq lazımdır?

Tək bir əlamətə əsasən evliliyin dağılmaq üzrə olduğu qənaətinə gəlmək olmaz. İnsanın davranışına işdəki çətinliklər, yorğunluq, stress və başqa amillər təsir göstərə bilər.

Əsas məsələ dəyişikliklərin uzun müddət davam edib-etməməsidir. Bunlar emosional qapalılıq, diqqətsizlik və ortaq problemləri həll etmək istəksizliyi ilə müşayiət olunursa, açıq söhbətə ehtiyac var.

Qarşı tərəfin fikirlərini təxmin etməyə çalışmaq əvəzinə hisslər, gözləntilər və narazılığın səbəbləri barədə danışmaq daha faydalıdır. Bir-birini dinləməyə hazır olmaq yaxınlığı bərpa etmək üçün ilk addım ola bilər.