Hafiz Məmmədov: “Bu möhtəşəm qələbə uzun müddət yaddaşlardan silinməyəcək”

“İnter” ölkəmiz adına layiqli mübarizə apararaq “Birlik Kuboku”nu qazandı, Azərbaycan bayrağını yüksəltdi və himnimizi səsləndirdi”. Lent.az-ın məlumatına görə, bu fikirlər “Bakı” futbol klubunun prezidenti Hafiz Məmmədov "İnter" klubuna "Birlik Kuboku"nu qazanması ilə əlaqədar ünvanladığı təbrik məktubunda yer alıb.

H.Məmmədov klub rəhbəri və AFFA İcraiyyə Komitəsinin üzvü kimi "İnter"i “Birlik Kuboku”nu qazanması münasibətlə təbrik edib. Onun sözlərinə görə, bu uğurun tərkib hissəsi olaraq, "İnter"in 1/4 finalda Ermənistan təmsilçisi "Mika" üzərində əldə etdiyi 4:0 hesablı möhtəşəm qələbə uzun müddət yaddaşlardan silinməyəcək. “Bakı”nın prezidenti “İnter”ə gələcək yarışlarda uğurlar arzulayıb.

Qeyd edək ki, Rusiyanın Sankt-Peterburq şəhərində keçirilmiş “Birlik Kuboku”nun finalında “İnter” Belarusun “Şaxtyor” (Soliqorsk) komandasını penaltilər seriyasında yenib – 6:5.