Aleksandr Starkov: “Belə variant istisna deyil” – MÜSAHİBƏ

Lent.az Latviya milli komandasının və “Skonto”nun baş məşqçisi ilə müsahibəni təqdim edir:
- Belə başa düşdüm ki, isti diyara gedişiniz dəqiqləşib və Siz Latviyanı tərk edirsiniz...
- Bəli. Demək olar ki, mənim "Bakı"ya keçidim qəti həllini tapıb. "Bakı"nın sabiq baş məşqçisi, məşhur almaniyalı mütəxəssis Vinfrid Şefer istefaya göndərilib. Yeri gəlmişkən, mən qərarımı birdən-birə verməmişəm. Hələ ötən il "Bakı" rəhbərliyi ilə ilkin danışıqlar aparmışam. İndi isə məsələyə tam aydınlıq gəlib.
- Bizim qurbağa bataqlığında dombalaq aşmaq sizi bezdirdi?
- Dərhal bildirim ki, mən heç yerdə belə deməmişəm və heç vaxt da deməyəcəyəm. Mən Latviya çempionatına hörmətlə yanaşıram. Hazırda "Skonto"da komplektləşdirildiyi kimi, gənclərlə işləmək həmişə mənim üçün maraqlı olub. Üstəlik, onlar inkişaf edirlər. Əks halda, heç bir çempionluq haqda söhbət gedə bilməzdi.
- Bakıya tək gedirsiniz?
- Xeyr. Moskva "Spartak"ında birgə işlədiyim İqor Klesov yeni klubumda da mənə kömək etməyə razılıq verdi.
- Latviyalı futbolçuları da özünüzlə aparacaqsınız?
- Belə variant istisna deyil. Axı sirr deyil ki, Azərbaycanda ilk növbədə maliyyə şərtləri bizdəkindən çox yaxşıdır. Gənclər isə perspektiv görməlidir. Əks halda, öz yerində sayacaqlar.
- Artıq yeni komanda haqda təsəvvürünüz var? Onu iş başında görmüsünüz?
- Canlı görməsəm də, bir neçə oyununun videoyazısına baxmışam. Futbolçularla qarşıdakı günlərdə tanış olacağam. Yeri gəlmişkən, komandada müqavilə ilə 16 legioner var. Hazırda Azərbaycan çempionatında fasilədir. Mən komandanı ilk oyuna fevralın 12-də çıxarmalıyam. Həmin oyun dərhal həlledici olacaq. Çünki "Bakı"nı ilk "6-lığ"a düşmək üçün ciddi və ağır mübarizə gözləyir. Sonra da final mərhələsində mükafatlar, eləcə də son illər Azərbaycan klublarının pis nəticələr əldə etmədiyi Avropa kuboklarına vəsiqə uğrunda oyunlar gözləyir.
- Latviya yığmasının baş məşqçi postunda qalacaqsınız?
- Bəli, qalıram. Bakıya gəlişimdə bu, mənim əsas şərtlərimdən biri idi. Razıyam, çətin olacaq. Amma mənim Latviya yığmasında kifayət qədər güclü məşqçilər heyətim var. Birgə səylərlə işimizin öhdəsindən gələcəyimizə inanıram.