Avropa çempionlarımız 2010-cu ilin ən yaxşıları sayıldı

Lent.az-ın məlumatına görə, ən yaxşı kanoeçi adına Sergey Bezuqlıy – Maksim Prokopenko dueti layiq görülüb. Bu cütlük Avropa çempionatının qalibi və gümüş mükafatçısı, Dünya Kubokunun ikiqat qalibi və ikiqat gümüş mükafatçısı, eləcə də dünya çempionatının gümüş mükafatçısı olub. Bütün bu uğurlara əsasən, Sergey Bezuqlıy – Maksim Prokopenko dueti ilin ən yaxşı kanoeçisi sayılıb.

Ən yaxşı akademik avarçəkən qismində Aleksandr Aleksandrov fərqləndirilib. Aleksandrov 23 yaşlılar arasında dünya çempionatında gümüş medal qazanıb.

Ən yaxşı kayakçı isə Tamerlan Mustafayev seçilib. 16 yaşlı idmançı müxtəlif beynəlxalq turnirlərin qalib və mükafatçısı olub.

Qeyd edək ki, hər üç növ üzrə fərqləndirilən avarçəkənlərimiz ilk dəfə ən yaxşı sayılıblar. 2009-cu ildə Valentin Demyanenko ən yaxşı kanoeçi, Cavid Əfəndiyev ən yaxşı akademik avarçəkən, Rüfət Vəlizadə isə ən yaxşı kayakçı seçiliblər.