Kiyevdə Dünya Azərbaycanlılarının Həmrəyliyi gününə həsr olunmuş turnir keçirilib

Kiyevdə Dünya Azərbaycanlılarının Həmrəyliyi günü münasibətilə bu ölkədə təhsil alan xarici tələbələrin mini futbol üzrə turniri keçirilib. Lent.az-ın məlumatına görə, yarış “Draqomanov” adına Kiyev Milli Pedaqoji Universitetinin idman kompleksində keçirilib. Yarışda səkkiz ölkənin – Azərbaycan, Türkiyə, İran, Koreya, Türkmənistan, Ekvador, Kamerun və Nigeriyanın tələbə idmançıları iştirak ediblər.

Turnirin qalibi adını üstünlüyünü sona qədər əldən verməyən iranlı idmançılar qazanıblar. Tədbirin təşkilatçısı, “Demokratiyanın nəbzi” beynəlxalq ictimai təşkilatının rəhbəri Hikmət Cavadovun sözlərinə görə bu turnirdə fərqlənən ən yaxşı idmançılar SMS səsvermə ilə seçilərək, beynəlmiləl yığma komandanın tərkibinə daxil olacaq. Həmin futbolçular Ukraynanın milli komandası ilə qarşılaşacaqlar. O həmçinin bildirib ki, bu tədbir idman turniri olmaqla yanaşı həm də bu xalqların gəncləri arasında qarşılıqlı dostluq əlaqələrinin inkişafına xidmət edir.

Turnirin sonunda tələbə idmançılara kubok və mükafatlar təqdim olunub.

Azər Qardaşlı