Futbol üzrə dünya çempionatı qışda keçirilə bilər

FİFA-nın İcraiyyə Komitəsinin üzvü Frans Bekkenbauer bəyan edib ki, 2022-ci ildə Qətərdə keçirilməsi nəzərdə tutulan dünya çempionatı qış mövsümünə salına bilər. Lent.az-ın “Sovetskiy Sport” qəzetinə istinadən verdiyi məlumata görə, Bekenbauer yanvar-fevral aylarını məsləhət görür. Onun sözlərinə görə, yayda Qətərdə havanın hərarəti 50 dərəcəni keçir və bu da iri futbol turnirinin keçirilməsini qeyri-mümkün edir.

Qeyd edək ki, Qətər tərəfi sifariş ərizəsində oyunların daha normal şəraitdə keçirilməsi üçün bütün meydanların süni soyutma sistemi ilə təchiz ediləcəyinə söz verib.

Bekkenbauer bu məsələnin müxtəlif həll variantları üzərində düşünmək lazım olduğunu vurğulayıb: “Yanvar-fevral aylarında Qətərdə hərarət 25 dərəcə olur. Odur ki, 2022-ci il üçün iri liqaların cədvəlində dəyişiklik etmək üzərində düşünülə bilər. Bu, meydanlarda süni iqlimin yaradılmasına alternativ həll ola bilər”.