Unibank Premyer Liqasında gözlənilən istefa

Salyanın “Muğan” futbol klubunun baş məşqçisi Almir Hurtiç istefa verib. Lent.az-ın məlumatına görə, bosniyalı mütəxəssis istefa qərarını “Neftçi” ilə noyabrın 13-də keçirilmiş Unibank Premyer Liqasının XIII tur matçından sonra açıqlayıb.

“Muğan”ın 0:3 hesabı ilə uduzması Hurtiçin postunu tərk etməsi ilə nəticələnib. Salyan klubunun vitse-prezidenti Bəhruz Şirəliyev Lent.az-a açıqlamasında baş məşqçi istefasını gözlənilməz saymadığını bildirib. Lakin o, rəhbərliyin istefanı hələ qəbul etmədiyini söyləyib: “Düzü, komandamız son turlarda heç də uğurlu çıxış etmirdi. Halbuki biz baş məşqçi qarşısına hər oyuna qələbə üçün çıxmaq tapşırığını qoyurduq. Görünür, ardıcıl uğursuz nəticələr Hurtiçi belə qərara sövq edib. Düzdür, “Neftçi”yə məğlubiyyətimizdə baş hakim Anar Salmanovun təmiz penaltimizi verməməsi də həlledici oldu. Amma hər halda 0:3 hesabı ilə məğlub olmuşuq. Bu səbəbdən, baş məşqçi istefa verib. Oyundan sonra klub rəhbərliyindən heç kim Hurtiçi istefaya məcbur etməyib. Biz hələlik onun istefasını müzakirə etməmişik. Günün sonunadək bu haqda qəti qərara gələcəyik. Amma çox güman ki, Hurtiçin istefasını qəbul edəcəyik”.

Qeyd edək ki, “Muğan” 13 turdan sonra 11 xalla 9-cu pillədə qərarlaşıb.

Elşən MƏMMƏDOV