Ermənistandan bir medal gətirəcəyik

Ermənistanın paytaxtı İrəvanda gənclər arasında keçirilən boks üzrə Avropa çempionatında Azərbaycan milli komandasının 1 medalla kifayətlənəcəyi müəyyənləşib. Lent.az-ın məlumatına görə, yarışa qatılan 7 boksçumuzdan 6-sı artıq mübarizəni dayandırıb.

¼ finaladək irəliləməyi bacaran 3 təmsilçimizdən yalnız Pərviz Bağırov yarımfinala yüksələrək, ən azı bürünc medalı təmin edib. 64 kq çəki dərəcəsində yer alan boksçumuz litvalı Eymantas Stanionisə qalib gəlib – 13:7. O, yarımfinalda qvatemalalı Lester Normandi Martines Tutla üz-üzə gələcək. Döyüş dekabrın 6-da Bakı vaxtı ilə saat 15:15-də başlanacaq.

Orxan Mayıllı (75 kq) qazaxıstanlı Daulet Bayqabatova yenilib – 6:8. Rahil Məmmədli (91 kq) isə Daniel Uilyamsa (İngiltərə) uduzub. İlk raundda Uilyams hesabda 6:5 öndə ikən Məmmədli başından aldığı zədə səbəbindən döyüşü davam etdirə bilməyib.

Daha 4 boksçumuzdan Tural Əhmədov (52 kq) 1/8 finalda, Saqi Salehli (69 kq) və Rauf Rəhimov (81 kq) 1/16 finalda, Nəsrəddin Məmmədov (56 kq) isə 1/32 finalda uduzaraq, mübarizəni dayandırıb.

Qeyd edək ki, dünya çempionatına dekabrın 7-də yekun vurulacaq.