“Bakı” klubundan “20 milyon avro” xəbərinə reaksiya

Klubun Media və Marketinq Departamentinin rəhbəri Nəriman Mehdiyev Lent.az-a açıqlamasında Madrid təmsilçisinin hesabına müəyyən məbləğdə vəsaitin köçürüləcəyini təsdiqləyib.

Lakin o, “AS” qəzetinin yazdığı məbləğdən xəbərsiz olduğunu bildirib. Mehdiyevin sözlərinə görə, vəsait 3 illik müqavilə qarşılığında ödəniləcək: “Bura təkcə “Real Madrid”lə İspaniya çempionatı matçına “Atletiko”nun “Land of Fire Azerbaijan” (“Odlar yurdu Azərbaycan”) yazılmış forma ilə çıxması daxil deyil. Biz onlarla 3 illik müqavilə bağlamışıq. Anlaşmaya əsasən, Azərbaycanın 10-15 yaşlı futbolçuları “Atletiko”nun bazasında “Bakı” klubunun hesabına təcrübə keçəcəklər, mövsümün sonunda Madrid təmsilçisi Bakıya gələrək, Azərbaycanın seçmə futbolçulardan ibarət komanda ilə yoldaşlıq matçına çıxacaq. Bunlarla yanaşı, “Santyaqo Bernabeu” stadionunda keçiriləcək Madrid derbisində “Altetiko”nu Azərbaycanı təbliğ edən formada görəcəyik”.

Mehdiyev bildirib ki, ödəniləcək məbləğə dair ən dəqiq məlumat ilin sonunda “Atletiko”nun maliyyə hesabatında əksini tapacaq: “Yəqin ki, həmin sənəd ictimaiyyətə açıqlanacaq və “Bakı”dan nə qədər ödəniş olduğu da orada göstəriləcək”.

Qeyd edək ki, AS qəzeti “Atletiko”nun hesabına 20 milyon avro ödəniləcəyi barədə məlumat yayıb. Bu xəbər həmin məbləğin yalnız 1 oyun üçün verildiyinə dair söz-söhbətlərə səbəb olub.

Elşən MƏMMƏDOV