Hakan Şükür istefa təhlükəsi ilə üz-üzə

Ötənlərin məşhur futbolçusu Hakan Şükür Türkiyə Böyük Millət Məclisindəki (TBMM) deputat mandatını itirə bilər. Lent.az-ın məlumatına görə, Ədalət və İnkişaf Partiyasının İstanbuldan seçilmiş millət vəkili seçim qarşısında qalıb. TBMM Etika Komissiyasının hazırladığı layihəyə əsasən, millət vəkillərinin əlavə ödənişli iş görmələrinə qadağa qoyulacaq. Bura özəl sektor da daxil ediləcək. Beləliklə, millət vəkilləri köşə yazarlığı, televiziya proqramının aparıcısı və idman şərhçisi kimi işlərdə çalışa və əmək haqqı ala bilməyəcəklər.

İndi Şükür ya özəl telekanalların birində idman verilişinin şərhçisi kimi çalışmaqdan, ya da deputat mandatından imtina etməlidir. Başda o, olmaqla ikinci işdə çalışan millət vəkilləri qanun qüvvəyə mindikdən 3 ay sonra əlavə ödənişli vəzifələrdən istefa verməlidir. Əks halda, onlar həbssiz deputatlıqdan məhrum ediləcəklər.