FİFA-dan Droqbaya qadağa

FİFA kot d ivuarlı futbolçu Didye Droqbanın Çinin “Şanxay Şenxua” klubunu qış transfer pəncərəsi açılanadək tərk etməsinə qadağa qoyub. Lent.az-ın məlumatına görə, ali futbol qurumu 34 yaşlı hücumçunun 2013-cü il yanvarın 1-dən tez başqa kluba keçidin qaydalara uyğun olmadığını bildirib.

Bu səbəbdən, istisna variantın qeyri-mümkünlüyü onun diqqətinə çatdırılıb.

Droqba FİFA-ya müraciətində başqa komandaya keçidinə icazə verilməsini xahiş edib. O, istəyini 2013-cü ilin yanvarında start götürəcək Afrika Millətlər Kuboku öncəsi forma yığmağa ehtiyac duyması ilə əlaqələndirib. Çin çempionatı başa çatdığından, 34 yaşlı forvard başqa komandada icarə əsasında çıxış etmək niyyətində idi. O, sabiq klublarından birinə - ya Fransa “Marsel”inə, ya da İngiltərənin “Çelsi” komandasına keçmək istəyirdi.

Qeyd edək ki, Didye Droqba 2011-2012-ci il mövsümündə Çempionlar Liqasını qazanan “Çelsi” ilə yeni müqavilə şərtlərində anlaşa bilmədiyi üçün iyunda “Şanxay Şenxua”ya keçib. O, Çin çempionatında 11 oyuna 8 qol vurub. Sonuncu tur noyabrın 3-də olub. Droqbanın hesabında İngiltərə Premyer Liqasının 3 qızıl medalı da var.