“Qarabağ”ın canlı əfsanəsi - FOTO

Futbol üzrə Topaz Premyer Liqasının XIII turu Ağdamın “Qarabağ” klubu və baş məşqçisi Qurban Qurbanov üçün əlamətdar olub. Lent.az-ın Peşəkar Futbol Liqasının rəsmi saytına istinadən verdiyi məlumata görə, “Simurq”la qarşılaşmada qazanılan 2:1 hesablı qələbə tarixi əhəmiyyət kəsb edib.

135-ci dəfə ağdamlıları baş məşqçi kimi çempionat oyununa çıxaran Qurbanov 65-ci dəfə qələbə sevinci yaşayıb. Qələbələrdən hərəyə 14-ü 2008-2009 və 2009-2010-cu il mövsümlərinə təsadüf edib. 17 qələbə 2010-2011, 15-i 2011-2012, 5-i isə 2012-2013-cü il mövsümlərində gerçəkləşib.

Bununla da Qurbanov “Qarabağ”ın baş məşqçisi postunda çempionatda ən çox qələbə qazanan mütəxəssis olub. O, Ağasəlim Mircavadova məxsus rekordu arxada qoyub. Təcrübəli mütəxəssis 119 çempionat oyununda 64 dəfə “Qarabağ”ın qələbəsinə memarlıq edib, 33 heç-heçə edib və 22 dəfə məğlub olub. Bu qarşılaşmalarda top fərqi 185-87-dir.

“Qarabağ”ın çempionat oyunlarındakı qələbə sayında 3-cü pillədə isə Şahin Diniyevdir. Onun rəhbərliyi altında komanda 31 dəfə 3 xala sevinib.