Türkiyə - Azərbaycan matçında kütləvi dava

Türkiyə və Azərbaycanın reqbi üzrə milli komandaları arasında Antalyanın Kəmər qəsəbəsində keçirilmiş Avropa Millətlər Kuboku matçında dava düşüb. Lent.az-ın Türkiyə mətbuatına istinadən verdiyi məlumata görə, olay matçın 66-cı dəqiqəsində meydan sahibləri 53:3 hesabı ilə öndə olduqları vaxt baş verib.

İki komanda oyunçularının bir-birilərə qarşı sərt oynamaları toqquşmaya səbəb olub. Reqbiçilər arasındakı gərginlik tribunalara da sirayət edib. Yerli azarkeşlər millimizin üzvlərinin ünvanına müxtəlif kobud ifadələr səsləndiriblər. Bu isə bəzi azərbaycanlı reqbiçilərin təpkisi ilə qarşılanıb. Onlar tribunalara qalxaraq, azarkeşlərə hücum ediblər. Əsəblərinə hakim ola bilməyən təmsilçilərimizi komanda yoldaşları çətinliklə sakitləşdiriblər. Tribuna qarşısına gələn bir reqbiçimiz isə əli ilə fəxri tribuna önündəki pannonu vurub. Baş verənlərin ardından hakim oyunu dayandırıb.

Hadisə nəticəsində hər iki komandanın bəzi oyunçuları yüngül yaralanıb. Davanın daha böyük miqyas almasına elə yığma üzvləri imkan verməyiblər.

Türkiyə milli komandasının baş məşqçisi Neyl Dogerti əvvəllər heç vaxt belə bir gərginlik görmədiyini açıqlayıb.