Azərbaycanlı mütəxəssis dünyanın ən yaxşı məşqçisi sayılıb

Lent.az-ın məlumatına görə, bu barədə Beynəlxalq Güləş Federasiyaları Assosiasiyasının (FİLA) Bolqarıstanın paytaxtı Sofiyada keçirilən seminarında qurumun prezidenti Rafael Martinetti açıqlama verib.

O, Umudova dünyanın ən yaxşı məşqçisi üçün hazırlanan xüsusi kuboku, qızıl medalı və müvafiq sertifikatı təqdim edib. Seminarın gedişində güləşçilərimizin 2012-ci il London Yay Olimpiya Oyunlarında çıxışı da xüsusi müzakirə mövzusu olub. Yarışın statistik məlumatları açıqlanarkən bildirilib ki, Pekin olimpiadası ilə müqayisədə yığma komandamız inkişaf tempi baxımından dünyanın ən qabaqcıl güləş ölkəsinə çevrilib.
Olimpiya çempionlarımız Toğrul Əsgərov və Şərif Şərifovun Londondakı çıxışlarını əks etdirən videogörüntülərin təhlili seminar iştirakçılarının böyük marağına səbəb olub və FİLA nümayəndələri onların hər ikisini dünya güləşinin nadir inciləri adlandırıblar. Seminar noyabrın 18-də yekunlaşacaq.

Qeyd edək ki, FİLA-nın texniki komitəsi quruma üzv olan bütün məşqçilərin il ərzində fəaliyyətini diqqətlə izləyir və ilin yekununa əsasən dünyanın ən yaxşısını müəyyənləşdirir. Firdovsi Umudov 2008-ci ildən etibarən məşqçilər assosiasiyasının üzvüdür. O, London olimpiadasında 2 qızıl, 1 bürünc medal qazanmış Azərbaycan sərbəst güləşçilərinin uğurlu nəticələrində böyük pay sahibi olduğu üçün bu mükafata layiq görülüb. Millimizin baş məşqçisi isə dağıstanlı mütəxəssis Saypulla Absaidovdur.