DÇ-2014: Azərbaycan millisinin ilk qələbə şansı

Lent.az-ın məlumatına görə, millimiz Şimali İrlandiya yığmasının qonağı olacaq.

Belfast şəhərindəki “Windsor Park” stadionunda keçiriləcək oyunu ukraynalı referi Viktor Şvetsov idarə edəcək. Ona həmyerlilərindən Aleksandr Kornıyko və Oleq Plujnik yan xətt hakimləri, Anatoli Abdula isə dördüncü hakim qismində yardımçı olacaqlar.

F qrupunda yer alan Azərbaycan millisi indiyədək 3 seçmə oyun keçirib. Bakıda İsraillə heç-heçə edən komandamız səfərdə Portuqaliyaya 0:3, Rusiyaya 0:1 hesabı ilə uduzub. Hazırda yığmamız 1 xalla 5-ci pillədədir. Şimali İrlandiya isə 3 oyundan 2 xal yığa bilib. Baş məşqçi Maykl O Nilin komandası Rusiyaya 0:2 hesabı ilə uduzduqdan sonra evdə Lüksemburqla, səfərdə isə Portuqaliya ilə heç-heçə edib – 1:1. Millimiz ardıcıl 3-cü səfər matçından qalib ayrılmağı bacarsa, xallarını 4-ə çatdıracaq və 4-cü pilləyə yüksələcək.

Hər iki komanda oyuna itkilərlə çıxacaq. Yığmamızın heyətində qapıçı Kamran Ağayev cəza, kapitan Rəşad Sadıqov, eləcə də Mahir Şükürov və Aqil Nəbiyev zədə üzündən matçı buraxacaqlar. Meydan sahiblərindən isə Qrant Makkan ailə problemləri ilə əlaqədar, Conni Evans, Endryu Litl, Aleks Bryus və Ceymi Uord zədə səbəbindən heyətdən kənarlaşdırılıblar.

Görüş Bakı vaxtı ilə saat 23:45-də başlanacaq.

Bu gün Avropa zonasında daha bir seçmə oyun H qrupunda olacaq. Çernoqoriya yığması saat 21:00-da San-Marinonu sınağa çəkəcək.

Yığmamızla eyni qrupda yer alan digər ölkələrə gəldikdə, Rusiya ABŞ-ı, İsrail Belarusu, Lüksemburq Şotlandiyanı sınağa çəkəcək, Portuqaliya isə Qabonun qonağı olacaq.