AFFA “Neftçi” üçün 17 min bilet satıb

Noyabrın 8-də Tofiq Bəhramov adına Respublika stadionunda “Neftçi” və Rusiyanın “Rubin” komandaları arasında keçiriləcək futbol üzrə Avropa Liqası matçına bilet satışı yenə AFFA tərəfindən həyata keçirilir. Bu haqda Lent.az-a mərkəzi arenanın direktoru Akif İsmayılov məlumat verib.

Bu səbəbdən, o, matça nə qədər biletin satılmasından xəbərsiz olduğunu bildirib.

“Neftçi”nin Mətbuat və İctimaiyyətlə Əlaqələr Departamentinin rəhbəri Gündüz Abbaszadə isə Lent.az-a deyib ki, artıq 17 min bilet satılıb. Soyuq və küləkli hava şəraitinə baxmayaraq, oyuna maraq böyükdür. Matç saatlarında bilet satışının daha da intensivləşəcəyi gözlənilir. 32 min tamaşaçı tutumuna malik stadionun saat 21:00-da başlanacaq oyunadək dolacağı gözlənilir.

Qeyd edək ki, iki həftə öncə Kazanda şaxtalı hava şəraitində keçirilmiş “Rubin” – “Neftçi” matçını cəmi 5 min azarkeş izləyib. Görüş meydan sahiblərinin qələbəsi ilə yekunlaşıb – 1:0.

Elşən MƏMMƏDOV