Flavinyo: “Bu, bizim üçün son şansdır”
07 noyabr 2012 20:56 (UTC +04:00)

Flavinyo: “Bu, bizim üçün son şansdır”

“Kazandakı görüşün ilk yarısında biz yaxşı oynamamışdıq. Təzyiq qarşısında irəli çıxa bilmirdik. Hava şəraiti bizə çox təsir etmişdi. Amma ikinci hissədə yaxşı oynadıq. Qol da vura bilərdik. Fikrimcə, bərabər səviyyədə çıxış etdik”. Lent.az-ın məlumatına görə, bunu “Neftçi” klubunun futbolçusu Flavinyo Rusiya “Rubin”i ilə noyabrın 8-də keçirəcəkləri Avropa Liqası matçı öncəsi mətbuat konfransında deyib.

Braziliyalı müdafiəçinin fikrincə, “Neftçi” Kazandakı oyunun ikinci hissəsindəki kimi çıxış etsə, Bakıda qələbə qazana bilər. Flavinyo bunun üçün əllərindən gələni edəcəklərini söyləyib. O, həmçinin “Rubin”lə qarşılaşmanı komandası üçün növbəti mərhələyə yüksəlmək baxımından son şans kimi dəyərləndirib: “Avroliqanın qrupuna düşmək bizim üçün arzu, yuxu kimi idi. Amma indi növbəti mərhələ barədə düşünürük. Bu oyunu uduzsaq, bilirik ki, qrupdan çıxma şansımız yoxdur. Ona görə də mütləq qələbəyə köklənməliyik. İnanırıq ki, azarkeşlər də tribunaları dolduraraq, bizi sevindirəcəklər”.

Qeyd edək ki, Tofiq Bəhramov adına Respublika stadionunda keçiriləcək “Neftçi” – “Rubin” matçı saat 21:00-da başlanacaq.

Elşən MƏMMƏDOV
# 1059

Oxşar yazılar