İqor Mitreski: “Sabah bizim günümüz olacaq”

“Avroliqa oyunları elə bir təcrübədir ki, ondan maksimum yararlanmaq lazımdır”. Lent.az-ın məlumatına görə, bunu “Neftçi” klubunun futbolçusu İqor Mitreski Rusiya “Rubin”i ilə noyabrın 8-də keçirəcəkləri Avropa Liqası matçı öncəsi mətbuat konfransında deyib.

Vaxtilə Rusiyanın “Spartak” komandasının heyətində Avropa kuboklarının iştirakçısı olmuş makedoniyalı müdafiəçi bütün yarışlara peşəkar səviyyədə hazırlaşmağın vacibliyini vurğulayıb. O, “Rubin”ə qarşı açıq oyun sərgiləyəcəklərini söyləyib: “Bizdə hər bir oyunçu baş məşqçinin tapşırıqlarını yerinə yetirməyə çalışır. Hamı bir-birinə kömək etməlidir. İnanıram ki, sabah da belə olacaq. Futbol komanda oyunudur. Rəqib nə qədər imkan versə, o qədər də yaxşı oynamağa çalışacağıq. Alınsa, qol vurmağa çalışacağıq. Amma biz əlimizdən gələnin ən yaxşısını etməyə çalışacağıq. Sabah bizim günümüz olacaq”.

Mitreski azarkeş dəstəyinə də ehtiyac duyduqlarını söyləyib. O, hazırda əsas məqsədlərinin yer aldıqları qrupda maksimum xal toplamaqdan ibarət olduğunu vurğulayıb.

Qeyd edək ki, Tofiq Bəhramov adına Respublika stadionunda keçiriləcək “Neftçi” – “Rubin” matçı saat 21:00-da başlanacaq.

Elşən MƏMMƏDOV