“Rubin”in baş məşqçisi “Neftçi”yə sirr vermədi
05 noyabr 2012 13:10 (UTC +04:00)

“Rubin”in baş məşqçisi “Neftçi”yə sirr vermədi

“Rubin” klubunun baş məşqçisi Kurban Berdıyev futbol üzrə Rusiya Premyer Liqasının 14-cü turunda “Mordoviya”nı 3:1 hesabı ilə yendikləri görüşdə 5 əsas heyət oyunçusunun xidmətindən yararlanmayıb. Lent.az-ın məlumatına görə, Saranskdakı qarşılaşmaya Gökdəniz Karadəniz, Salvatore Boketti, Karlos Eduardo, Roman və Aleksey Yeryomenko qardaşları aparılmayıb.

Süni örtüklü meydanda keçirilmiş görüşdə Kazan komandasından qolları Vladimir Dyadyun 10-cu və 75-ci, Salomon Rondon isə 90-cı dəqiqədə vurub. Görüş sonrası mətbuat konfransında Berdıyev 5 oyunçunun yoxluğuna konkret səbəb açıqlamaqdan imtina edib: “Bizim həm zədəli, həm də süni meydanda oyuna çıxmamalı olan futbolçularımız var”.

Təcrübəli mütəxəssis Boketti və Roman Yeryomenkonun zədələrinin nə dərəcədə ciddi olduğunu da deməyib. “Onlar Bakıda “Neftçi”yə qarşı oynaya biləcəklərmi” sualına Berdıyev belə cavab verib: “Mən rəqiblərimizə əlavə informasiya verməmək üçün bu barədə danışmayacağam. Bəli, zədəlilərimiz var. Lakin onların Avropa Liqası matçına hazırlıq səviyyəsinə noyabrın 6-dan tez aydınlıq gəlməyəcək”.

Qeyd edək ki, noyabrın 8-də Bakıdakı Tofiq Bəhramov adına Respublika stadionunda keçiriləcək “Neftçi” – “Rubin” matçı saat 21:00-da başlanacaq.
# 1045

Oxşar yazılar