Rusiya yığmasının hər futbolçusuna Azərbaycanla oyun öncəsi 45 min avro

Futbol üzrə Rusiya milli komandası Portuqaliya və Azərbaycan yığmaları ilə keçirəcəyi 2014-cü il dünya çempionatının seçmə qrup matçları öncəsi mükafatlandırılacaq. Lent.az-ın “Sovetskiy Sport”a istinadən verdiyi məlumata görə, şimal qonşularımız 2012-ci il Avropa çempionatındakı çıxışları müqabilində hərəyə 45 min avro qazanacaqlar.

Əslində Rusiya millisi qitə çempionatında qrup mərhələsini adlaya bilməyərək, uğursuzluğa düçar olub. Amma Rusiya Futbol İttifaqı komandanın Ukrayna və Polşada keçirilmiş çempionata vəsiqə qazanmasını, eləcə də qrup oyunlarında Çexiyanı 4:1 hesabı ilə yendikdən sonra Polşa ilə 1:1 hesablı heç-heçə etməsini yüksək qiymətləndirib. Çexiya qələbəsinə 30 min avro, Polşa bərabərliyinə isə 15 min avro mükafat yazılıb. Mükafatlar yığmanın futbolçuları, məşqçiləri və inzibati heyətinə ödəniləcək.

Qeyd edək ki, dünya çempionatının seçmə tsiklindəki mükafatlandırma sistemi Avropa birinciliyinə seçimdəkindən fərqlənməyəcək. Yenə futbolçular konkret matçlarda qələbə, habelə, qarşıya qoyulmuş vəzifənin yerinə yetirilməsi qarşılığında qazanacaqlar.