Milli komandamız dünya çempionatına yola düşüb

Sentyabrın 10-da dağa idman dırmanması üzrə milli komandamız Parisə yola düşüb. Azərbaycan Hava və Ekstremal İdman Növləri Federasiyasından (FAİREX) Lent.az-a verilən məlumata görə, 12-17 sentyabr tarixlərində Fransada keçiriləcək idman dırmanması üzrə dünya çempionatında ölkəmizi FAİREX idmançılarından ibarət 8 nəfərlik komanda - 4 oğlan və 4 qız idmançı təmsil edəcək.

Gənclər və İdman Nazirliyinin “Təqvim Planına” əsasən, dünya çempionatında iştirak edəcək milli yığma komandanı Gənclər və İdman Nazirliyinin nümayəndəsi ilə yanaşı, FAİREX-in rəhbərliyi, eləcə də Federasiya tərəfindən Türkiyədən dəvət olunmuş idman dırmanması üzrə peşəkar mütəxəssis müşayiət edir.

Qeyd edək ki, bu mötəbər yarışda FAİREX rəhbərliyinin Beynəlxalq Dağa İdman Dırmanması Federasiyasının (İFSC) rəhbərliyi ilə 22-23 iyun 2013-cü il tarixlərində Bakıda ilk dəfə keçiriləcək idman dırmanması üzrə Dünya Kubokunun mərhələ yarışının təşkili ilə bağlı bəzi məsələlər barədə məsləhətləşmələr aparacağı da nəzərdə tutulur.