Əsgərlik bitdi – yenidən sıtaya

“Bakı”nın hərbi xidmətə yollanan futbolçuları Elvin Məmmədov, Novruz Məmmədov və Aqil Məmmədov 1 aylıq fasilədən sonra yenidən komandanın məşqlərinə qatılıblar. Lent.az-ın klubun rəsmi saytına istinadən verdiyi məlumata görə, hər üç oyunçu Azərbaycan Prenyer Liqasının növbəti turunda “Rəvan”la keçirəcəkləri matçın hazırlıq prosesində iştirak edirlər.

Əvəzində heyətdə milli komandalara dəvət alan futbolçuların yoxluğu diqqət çəkir. Maris Verpakovskis və Denis İvanov Latviya, Georgi Popxadze Gürcüstan, Rəhman Hacıyev Azərbaycanın 21 yaşadək, Namik Ələsgərov isə ölkəmizin 19 yaşadək milli komandasının düşərgəsinə yollanıb.

“Rəvan”la görüş öncəsi “Bakı” 2 yeni transferini ictimaiyyətə təqdim edib. Yunanıstanlı hücumçu Vagelis Mantsios peşəkar karyerasına “Panionios” da başlayıb. 4 mövsüm (2001 - 2005) bu klubda çıxış etmiş forvard 70 oyunda 15 qola imza atıb. 2005-ci ildə Yunanıstanın böyük klublarından “Panatinaikos”a keçən futbolçu 6 il (2011-ci ilə qədər icarə fasilələri ilə birlikdə) 68 oyun keçirib və qol vurub.

Mantsios 2008-ci ildə Almaniyanın “Ayntraxt” (10 oyun, 1 qol), 2010-cu ildə Cənubi Kiprin “Anortosis” (14 oyun, 9 qol) və 2011-ci ildə Portuqaliyanın “Maritimu” (1 oyun) klublarına icarəyə verilib. 29 yaşlı futbolçu 2011-2012-ci il mövsümündə OFİ klubunun şərəfini qoruyub. Mantsios ada təmsilçisinin heyətində 22 oyuna çıxıb, 7 qola imza atıb. Cari mövsümdən “Bakı”nın heyətinə cəlb olunan oyunçunun boyu 191 sm. çəkisi 81 kiloqramdır. Mantsios 2006-cı ildə Yunanıstan milli komandasının heyətində debüt edib və milli formada 7 oyun keçirib.

Çuço ləqəbli Leandro Rodriqo Beçerra 1984-cü il yanvarın 26-da Argentinanın Kordoba şəhərində anadan olub. 2005-ci ildə peşəkar futbolda ilk qədəmlərini atan Beçerra Meksikanın “Merida” klubunda çıxış edib. 2006-cı ildə ABŞ-ın “DC United” klubna transfer olunub. Beçerra növbəti 5 il ərzində Argentina klublarının şərəfini qoruyub. “Atletico Rafaelo” (2006-2007), Tiro Federal (2007-2008), “Belgrano de Cordoba” (2008-2009), “San Martín de San Juan” (2009-2010), “Atlético Tucumán” (2010-2011) klublarının şərəfini qoruyan futbolçu ötən il Avropaya üz tutub. Beçerra Yunanıstan yüksək liqa təmsilçisi “PAS Ciannina”nın heyətinə dəvət olunub. Hücumameyyli yarımmüdafiəçi, əsasən, meydanın sol cinahında inamlı təsir bağışlayır. Boyu 175 sm, çəkisi 69 kq-dır. Ötən mövsüm o, Yunanıstan yüksək liqasında 7 qola imza atıb.

Qeyd edək ki, “Rəvan” – “Bakı” matçı avqustun 18-də “Dalğa Arena”da baş tutacaq.