Baş məşqçidən futbolçulara komendant saatı

İtaliya “Fiorentina”sının baş məşqçisi Vinçentso Montella komandanın futbolçularına sırğa və digər qızıl bəzək əşyaları, habelə baş sarğıları gəzdirməyi qadağan edib. Lent.az-ın “Football Italia”ya istinadən verdiyi məlumata görə, qadağa məşqlərə şamil ediləcək.

37 yaşlı mütəxəssis məşqlərdə şortlarını qatlamağın da qarşısını alıb. Futbolçular baldırlarını bərabər səviyyədə qaraltmaq üçün məşq vaxtı belə edirdilər. Montella bir qədər də irəli gedərək, mövsümöncəsi hazırlıq prosesi zamanı komendant saatı tətbiq edib. Yerli vaxtla saat 20:00-dan sonra futbolçuların məşq bazasını tərk etmələri yasaqlanıb. Bu qadağa bazar günlərinə də aiddir. Baş məşqçini belə sərt qaydalar tətbiq etməyə 2011-2012-ci il mövsümündə “Fiorentina” futbolçularının dəfələrlə qalmaqallarla üzləşmələri vadar edib.

Qeyd edək ki, Vinçentso Montella ötən mövsüm “Katanya”nın baş məşqçisi olub. O, “bənövşəyilər”in sükanı arxasına 2 ay öncə keçib.