“Xəzər Lənkəran”ın 1223 günü

“Xəzər Lənkəran” klubu futbol üzrə Azərbaycan Premyer Liqasında ardıcıl ikinci ev oyununu böyük hesablı qələbə ilə tamamlayıb. Lent.az-ın klubun rəsmi saytına istinadən verdiyi məlumata görə, “ağ-yaşıllar” bu dəfə Gəncə “Kəpəz”ini darmadağın edib – 4:0.

Yunis Hüseynovun komandası daha öncə ötən mövsümə “Qarabağ” üzərindəki 4:1 hesablı qələbə ilə yekun vurub. Bu, “Xəzər Lənkəran”ın tarixində 49-cu belə qələbəsidir. Ölkə çempionatında 37-ci fərqli qələbəyə sevinən futbolçular kubokda 11, “Birlik kuboku”nda 1 dəfə böyük hesablı qələbə qazanıb. Hüseynovun rəhbərliyi altında 2-ci darmadağın həm də mütəxəssisin fəaliyyəti dövründə ən böyük fərqli qələbədir.

Ümumiyyətlə, tarixində 22-ci dəfə 4 və daha çox fərqlə qalib gələn “Xəzər Lənkəran” 1223 gün idi ki belə zəfər çalmırdı. Buna sonuncu dəfə 2009-cu il aprelin 5-də təsadüf olunub. Həmin vaxt “Standard” Lənkərandan 0:4 hesablı məğlubiyyətlə ayrılıb. 2008/2009-cu il mövsümündəki həmin qələbədən sonra 3 top fərqinə dəfələrlə nail olunsa da, belə darmadağın qeydə alınmırdı.