SOCAR futbol üzrə Türkiyə çempionatının sponsoru ola bilər

Lent.az-ın məlumatına görə, bu barədə Vatan” qəzeti xəbər yayıb.

Xəbərdə bildirilir ki, I Liqanın yayım hüququna malik TRT şirkəti “Bank Asya”nın imtinasından sonra yeni titul sponsoru tapmaq üçün fəaliyyətə başlayıb. Bank Asya sponsorluq üçün ildə 10 milyon lirə ödəyib. TRT daha çox pul vermək iqtidarında olan şirkətlə anlaşmaq məqsədilə bir çox bank, telekommunikasiya, energetika şirkətləri və holdinqlərə müraciət edib. Teleşirkət sponsorluq etmək istəyən qurumdan təqribən 2 qat artıq - 18 milyon lirə (10 milyon dollar) istəyir. Səbəb “Bank Asya”nın I Liqaya sponsorluq etdiyi 1 il ərzində uğur qazanmasıdır. Mümkün namizədlər arasında “Türk Telekom”, “Halk Bank”, “Vakıflar Bankası” və SOCAR-ın adı çəkilir.

TRT-nin reklam şöbəsinin müdiri Altan Bahadır deyib: “I Liqa yalnız TRT kanallarında yayımlanmır. Anadolunun 18 komandasının yer aldığı çempionatda 311 matç keçiriləcək. Hər turun 9 matçından 5-i TRT1, TRT Spor, TRT HD və TRT Avaz vasitəsilə yayımlanacaq. Qalan 4 oyunun isə regional telekanallarla yayımlanması üçün müqavilə bağlayacağıq. Oyunları minlərlə azarkeş stadionda, milyonlarla insan isə evdə izləyəcək”.

SOCAR-ın mətbuat xidmətinin rəhbəri Nizaməddin Quliyev isə Lent.az-a açıqlamasında xəbərdən məlumatsız olduğunu deyib: “Yəqin ki, bu, bizim Türkiyədəki nümayəndəliyimizlə bağlı məsələdir. Mən xəbəri nə təkzib, nə də təsdiq edə bilərəm. Məsələni aydınlaşdırdıqdan sonra sizə daha dəqiq informasiya verəсəyik”.

Elşən MƏMMƏDOV