Yayın ən böyük kabuslarından sayılan ağcaqanadlarla bağlı uzun illərdir yayılan məşhur inancın doğru olmadığı məlum olub. Bir çox insan ağcaqanadların qurbanlarını qan qrupuna və ya "şirin qana" görə seçdiyini düşünsə də, son elmi araşdırmalar bunun həqiqəti əks etdirmədiyini göstərib.
Lent.az xəbər verir ki, mütəxəssislərin apardığı laboratoriya tədqiqatları nəticəsində müəyyən edilib ki, ağcaqanadlar insanları qan qrupuna görə deyil, dəridən yayılan xüsusi kimyəvi maddələrə əsasən seçirlər.
Araşdırmalar göstərib ki, ağcaqanadlar insan orqanizminin ifraz etdiyi yüzlərlə kimyəvi birləşmədən cəmi 27-ni ayırd edə bilir. Bu maddələr arasında ən güclü cəlbedici təsirə malik olan isə dəri yağlarının parçalanması nəticəsində yaranan "1-octen-3-ol" adlı birləşmədir. Elmdə "göbələk spirti" kimi tanınan bu maddənin miqdarındakı kiçik artım belə insanı ağcaqanadlar üçün daha cəlbedici edə bilir.
Alimlər bildirirlər ki, insan orqanizminin kimyəvi tərkibi zamanla dəyişdiyi üçün heç kim ömürboyu ağcaqanadların daimi hədəfi olmur. Həyat tərzi, qidalanma, hormonal dəyişikliklər və ətraf mühit amilləri bu kimyəvi siqnallara təsir göstərə bilər.
Mütəxəssislərin sözlərinə görə, yalnız dişi ağcaqanadlar insanları sancır. Onlar qurbanlarını tapmaq üçün üç mərhələli sistemdən istifadə edirlər.
Birinci mərhələdə ağcaqanadlar nəfəs aldığımız zaman xaric etdiyimiz karbon qazını onlarla metr uzaqdan hiss edir və istiqamətlərini həmin mənbəyə doğru dəyişirlər.
İkinci mərhələdə təxminən 10 metr məsafədə karbon qazı ilə insanın özünəməxsus bədən qoxusu birləşərək daha güclü siqnal yaradır. Məhz bu mərhələdə bəzi insanların digərlərinə nisbətən daha çox sancılmasının səbəbi ortaya çıxır.
Son mərhələdə isə bədən istiliyi və dərinin rütubət səviyyəsi ön plana keçir. Ağcaqanadlar ən uyğun hədəfi müəyyən etdikdən sonra yaxınlaşaraq sancmanı həyata keçirirlər.
Ağcaqanadlardan qorunmağın yolları
Mütəxəssislər ağcaqanadlardan qorunmaq üçün ilk növbədə geyim seçiminə diqqət etməyi tövsiyə edirlər. Qara, tünd göy və tünd qırmızı kimi rənglər ağcaqanadların diqqətini daha çox çəkdiyindən açıq rəngli və bol geyimlər daha məqsədəuyğun hesab olunur.
Yataq otaqlarında ağcaqanad torlarından istifadə etmək, pəncərələrə qoruyucu tor quraşdırmaq və açıq havada təsdiqlənmiş həşəratəleyhinə vasitələrdən yararlanmaq da effektiv üsullar sırasındadır.
Bundan əlavə, xüsusilə axşam saatlarında ağır və yağlı qidalardan uzaq durmaq, daha yüngül qidalanmaq və uzun müddət açıq havada qalmamaq tövsiyə olunur.
Beləliklə, ağcaqanadların insan seçimi qan qrupundan daha çox bədənimizin yaydığı xüsusi kimyəvi siqnallarla bağlıdır. Bu səbəbdən bəzi insanlar yay aylarında daha çox sancmaya məruz qala bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
