Zaqatalada avtoqəza: üç nəfər xəsarət alıb

Zaqatala rayonunda baş verən yol qəzasında üç nəfər xəsarət alıb. APA-nın Şəki-Zaqatala bürosunun məlumatına görə, hadisə Yevlax-Zaqatala-Gürcüstan magistiral yolunun 126-cı kilometrliyində, Zaqatala rayonu Yuxarı Tala kəndi ərazisindən keçən hissəsində baş verib. İki VAZ-2107 markalı, 90 LP 962 və 10 KR 347 dövlət qeydiyyat nişanlı avtomobilləri bir-biri ilə qarşı-qarşıya toqqaşıb. Qəza nəticəsində hər iki avtomobilin sürücüsü və bir sərnişin Zaqatala Mərkəzi Rayon Xəstəxanasına (MRX) yerləşdiriliblər.

Zaqatala MRX-dan APA-ya verilən məlumatda Zaqatala rayonu ərazisndə baş verən qəza nəticəsində üç nəfər şəxsin müxtəlif dərəcəli bədən xəsarətləri ilə Zaqatala MRX-a yerləşdirilməsi faktı təsdiqlənib və xəsarət alan şəxslərin adları açıqlanıb. Bunlar 1986-cı il təvəllüdlü, Zaqatala rayonu Göyəm kənd sakini Elnur Şəkərov, onun həmkəndlisi 1990-cı il təvəllüdlü Namiq Qantarov və 1963-cü il təvəllüdlü, Qax rayonun Tasmalı kənd sakini Kərim Ramazanovdur.

Xəstəxanadan bildirilib ki, hazırda qəza nəticəsində xəsarət alan şəxslərin vəziyyəti orta-stabildir və müalicələri xəstəxanada davam etdirilir.

Faktla bağlı DİN-nin Baş Dövlət Yol Polisi idarəsinin istintaq və təhqiqat bölmsində cinayət işi açılıb, araşdırma aparılır.